KG Rot-Weiß "Die Stecher" e.V. Rülzheim

Am Aschermittwoch ist alles vorbei......

Beim Kehraus gab Yvonne Tüllman als Protokollerin die nachfolgende Büttenrede zum Besten:

Jesses wie die Zeit so schnell vergeht,
ä ganz Johr isch rum, wie vum Wind verweht.
Un widder wird vun mir glossiert,
was bei de Narre so manchmal passiert.

Mei Johr fangt an Aschermittwoch a
än wichtige Termin, des wissen ehr ja.
Wenn ich do in die Dampfnudel nuff geh,
un die viele Leit beim Heringsesse seh.
Denk ich die Ursel sollt uff ehre Arbeitspläne,
fer jeden Eisatz ä Esse fer umme erwähne.
Do het se dann ganz sicherlich,
mäner Leit wie Ärwet isch.

Beim Bärefescht in de Mittlere Ortsstroß,
war bei de Narre doch de Deifel los.
Mer glabt doch glatt, daß jeder Mann,
mit links sou ä Zeltl uffbaue kann.
Doch des war leider weit gefehlt,
stunnelang, so hot mer mir verzehlt,
hän die dezu gebraucht,
bis des Zelt war uffgebaut.

Am Dach denoch treffen sich dann do drauß´
Stück 20 Narre im Schützehaus.
Ach ä paar Kinner war´n debei
un die treffen die Scheib´ nit glei.
De Norbert Schulte als erfahrner Schitz,
erklärt de Karolin, des isch kän Witz,
wie mer´s Gewehr hebt, vun Kimme un Korn.
Drückt ab, s´gibt än Rückschlag, de Norbert hot Zorn.
Un außerdem, des war de Clou,
ä Bless an de Stern noch dezu.

Am Freizeitfescht gelingt de KGR de nächste Hit,
mit 2 Mannschafte machen se bei de Ostfriesenolympiade mit.
Gewinnen, mit Unnerstützung vum alte Prinzepaar,
glatt 2 Pokale, wirklich wunderbar.
Um die Humpe dann zu fille,
muß sich de Helmuth uff´s Rädel schwinge.
Aus de Narreburch schläft er Sekt dann bei,
un der war warm, so kann´s blouß bei Narre sei.

Zum Tagesausflug hän  sich die Vereinsbosse,
mol was besonderes eifalle losse.
Ä Bähnel wu ohne Schiene lääft,
wird glei zum Narreexpress getääft.
Durch Dörfer und Wingert bei strahlendem Sunneschei´
lechen mer irgendwu zwische Rewe unser Frühstückspaus´ei.

Dann geht´s weiter mit viel Helau,
im letschte Wage war vielleicht än Radau.
Dort hän se g´sunge, getrunke un gelacht,
nur de Text vum KGR-Lied hot känner zusamme gebracht.
Ich mußt dann uff de Clo mol gehe,
dort häb ich immer die beschte Idee.
Un ich sach eich, de Text isch mer eigfalle, sou ä Glück,
des Lied hämmer dann g´sunge uffem ganze Weg zurück.

Sou newebei sollt ich noch kurz erwähne,
de Edi wollt die Prinzessen betrunke mol sehne.
Selbscht noch de Sektprob hot die Doris kaum was g´spürt,
nur unsern Vorstand, der war meh als lädiert.

Mer annere war´n awer fit, un hän, des war gar nit leicht,
immer die Willi-Flasch vun Wache zu Wache gereicht.
In Rilz an de Narreburch, wollte mer dann,
die Flasch noch leere, so war de Plan.
Doch de Koch Mathias mit seine Bosse,
hot die Flasch uff´s Trottoir falle losse.

De Weihnachstmarkt war de nächste große Termin,
ach die Trudel un de Egon gehen zu uffbaue hin.
De Helmut schickt die 2 ins Feierwehrhaus sofort,
denn fer die Häusle zu ziere hot´s Christbääm dort.
Wie er se dann zum 4. Mol do niwer schickt, fangt Trudel a zu fluche
un gemeinsam mit dem Egon dun se dann mol suche.
De Helmut war halt mol widder im Trääm,
hinner´s Häusel hot er g´stellt ghatt, die erschte 3 Bääm.

Die Trudel dann in´s Häusel geht,
de Pizzaoffe fascht in Flamme steht.
Doch ä Feierwehrfrää kennt sich do aus,
un holt im Helmut sei verkohlte Handschuh blitzschnell raus.

Im Dezember war´s dann widder soweit,
de Schildertrupp der KGR macht sich bereit.
Wann die die Löcher suchen fer die Eisestange,
kinnscht mäne, die deden Elwetritsche fange.
Stecken halt ämol ä rot-weiß Fähnel draa,
not fangen ner nit alle Johr zu suche aa.

Die Nikolauswanderung muß ich leider kritisiere,
denn die kann der Verei äfach nit organisiere.
Nit nur die Kinner, ach die Ältere hän nit verstanne,
daß der Nikolaus noch 2 Minute schun widder zieht vun danne.
Un de Schriftführer, selbscht wenn er nit dut singe,
ä paar Weihnachtslieder abzutippe, mißtem doch gelinge.

Ich kumm dann zu de Gala glei,
was do passiert, isch ach nit nei.
Deden die Weißkittel vorher halt mol suche,
müßten se iwwer än fehlende Rathausschlüssel hinnerher nit fluche.

Als nächstes war die Vorderpfälzer Sitzung dann,
schun Woche vorher fing die Vorbereitung an.
Im Bauhof wird ghämmert, gebohrt un geschnitzt,
beim Schwäße de  Alwin sich die Äche verblitzt.
Owends liegt er dann ganz adrett,
mit ännere Grumbeere-Äche-Maske in seim Bett.

Sei Frää un ich hän derweil ä anneres Problem,
Kaffee un Kuche wemmer abiete, nur de Herre esch des nit sou genehm.
Platzmangel, Lärm, zu umständlich so lautet denne ehr Devise.
Mit Superkuche un Geld in de Kass, hämmer eich mol Gechedäl bewiese.

Also unser Prunksitzunge waren wirklich schee,
nur ebbes konnt ich nit versteh.
Schun in de 1. Sitzung kriecht de Sitzungspräsident,
dauernd sou ä komisches zittere in die Händ.
Dann zittert ach noch des Publikum,
des bringt mich jo vor Angscht fascht um.
Ä Epidemie bricht aus, ich witter die Gefahr,
de Vorstand erklärt mer, daß des nur ä LaOla-Welle war.

Die Endrund dann, was sell ich sache,
mer muß zufriede sei, un ni immer klache.
Schließlich hot mein Vadder indirekt,
ä neii Einnahmequell entdeckt.
Er zieht die Marumba-Flasche äfach aus,
un macht sou ä Pfandflasch draus.

Des hot de Helmut ach angespornt,
in de nächste Sitzung werren die alte Aluascher neu geformt.
Un die verdrickte Plastikbecher,
nutzen nur noch die ältere Zecher.
Weil die Becher sehnen jo fascht aus,
wie Schnaweltasse vum Altersheim drauß.

Am Sunndach owend war ä Abordnung in de Ros,
was deten die Landraue uhne uns Narre bloß.
Prinzepaar, Elferrat, Bütteredner un Männerballett,
hän glatt denne ehrn Owend gerett.

Doch die 3 Glockespiele war´n de absolute Hit,
doch mer versteh´n bis jetzt noch nit,
warum dem Dieter sein Schlengel,
war sou rießig im Vergleich zum Eierpännel.

Mit Riesetransparent hämmer schnell den Fanclub Trudel gegründ,
denn die kann äm lääd du, die esch jo ach nit blind.

Sou ich denk, ich häb genug jetzt g´scholte,
un sach eich, daß ich äns nit wollte.
Nämlich üwer eich zu hetze,
oder gar jemand verletze.
Doch sou ä ganz klä bißl Fopperei,
g´hört halt zu uns´rer Narretei.

H E L A U !

Auch beim Kehraus gab es genug zu lachen.